Una malediccion secuta los Baskervilles qu'ocupan lo maine vièlh dels aujòls. Un castelet perdut al mitan d'una landa enneblada e salvatja. D'udòls tenebroses s'ausisson dins lo bardàs grand de Grimpen. Venon acertanar una sinistra legenda. A còps, un gossàs que sembla un demòni, una òrra bestiassa, una feràmia giganta, sortís del sanhàs e escampilha la mòrt. Lo monde del parçan an paur. Anatz pas creire que seriá sens rason...
The hound of Baskervilles, òbra de N'Arthur Conan Doyle escricha en 1902, es un classic del roman negre. Virèt lo torn del monde dins l'arcolan de las lengas. En seguida de la version en gascon, vielha de mai de vint ans : Lo canhàs deus Baskervilles, avem aquí la del parlar lengadocian : Lo gossàs dels Baskervilles. Eric Chaplain e, mai que mai, Sèrgi Viaule que lo siu trabalh i foguèt majoral, menèron la revirada dins un occitan-lengadocian armoniós e ric, que se prèsta perfiechament a l'exercici. A legir Lo gossàs dels Baskerville, lo legeire occitan passarà, en companhia del celebrissime detectiva privat, En Sherlock Holmes e del famós doctor Watson, un moment inoblidable, a l'encòp romanesc e lingüistic.
Ua maladiccion que pesa suus Baskerville, vielha familha qui senhoreja dentz lo Devonshire, suu país ensauvadgit de la lana de Dartmoor. Un Canhàs gigant, demòni gessit de l'Ihèrn, que pareix e lo senhor de Baskerville que se'n moreix.
La mòrt sobta e tragica de'N Charles Baskerville, los cridòris d'un canhàs qui s'audéixenn capvath la lana, tot acò que dèixa créder la legenda que poiré estar vaduda realitat.
Talèu arribat a Londras, vienent deu Canadà, En Henry Baskerville que receu ua letra anonima : « Se tiénetz a la vòsta vita e a la vòsta rason, hètz-ves enlà de la lana ». A maugrat d'aqueras miaças, En Henry decideix d'anar a Baskerville Hall. Consultat, lo detectiu Sherlock Holmes encarga lo fidèu doctor Watson d'acompa-nhar lo joenn baronet.
L'enquista de Sherlock Holmes qu'a començat... Que serà longuèira, mauaisida e plea d'engoeix...
Roman lo mei famós de'N Arthur Conan Doyle, jòia de la literatura policièira, The Hound of Baskervilles qu'es estat arrevirat directament de l'anglés entau gascon per Eric Chaplain, e presentat aquí en version bilingüa dab lo tèste originau anglés.
